رسالة مفتوحة إلى السيد عبد اللطيف الحموشي : مواطن قاسمي يشتكي من تعسف ضابط أمن بالقنيطرة

الوطنية بريس _ عبد الحكيم الطالحي

* رسالة المواطن القاسمي ” زكرياء بلكاوي ” :

أنا مواطن مغربي .. اسمي زكرياء بلكاوي أقطن بمدينة سيدي قاسم، كل شهر كنمشي لمستشفى قنيطرة ثم للرباط باش ناخد واحد دوا على واحد المرض مزمن بزاااف ( له علاقة بالقلب والرئة) الثمن ديالو مليوني ونصف السنتيم شهريا.. معاناة كبيرة مع هذا المرض من 2017 لايخففها إلا مساعدة الدولة لهؤلاء المرضى بهذا النوع من المرض..

شكايتي معندهاش علاقة بهذا المرض.. شكايتي عندها علاقة بواحد المرض ديال التجبر والحكرة وشرع اليد لي باقين كيديروه شي ضباط ديال الأمن، وحسيت بواحد المرارة كبيرة ليوما وانا كنعيش هاد الحكرة..

يوم الجمعة في حدود الساعة الواحدة والنصف تعرضت لاعتداء شنيع من طرف ضابط أمن بمدخل محطة القطار بمدينة القنيطرة.. ( بدون زي رسمي، سروال دجين قميجة زرقة وسبرديلة، لونه يميل لسمرة شديدة ) تفاصيل الحادث تعود بعدما قام هذا الضابط بمطالبته لي بارتداء الكمامة، علما أنني كنت داير الكمامة على فمي ولايظهر إلا جزء صغير من أنفي.. قلت ليه راني مريض بالقلب والرئة ولا أستطيع التنفس بوضع الكمامة على فمي.. مع ذلك قام هذا الضابط بتوجيه كلام ناب في حقي.. الشيء لي خلاني نقوليه الله يجازيك بخير دير نتا الكمامة عاد نديرها أنا ( هوا كان مهبط الكمامة بالمرة على وجهه) ملي قلت ليه هاد الشي شنق عليا وخنقني مزيان وضربني بلكمة يد قوية لعنقي، خلاني طايح تمّا أمام باب المحطة.. هاد الشي وخا قلت ليه راني مريض مرض مزمن، ومع ذلك استمر في تخويفي وتهديدي بالقتل… فهاد اللحظة كلها وانا طايح وكنحاول غا تنفس حسيت بالموت قدامي.. تجمعو عليا الناس قلت ليهم تفرقو عليا خليوني غا نتنفس.. نفعني غاواحد السيد الله اجازيه بالخير جاب لي قرعة ديال الماء.. وكلشي مسجل فالكاميرات..

هاد الشي وقع ليا وانا غادي لرباط باش نشوف طبيب وناخد دوا ديالي.. هاد الضابط لي كان بدون زي رسمي، مقدوش هاد الشي لي دار فيا.. وعوض ميتاصل بالاسعاف يجيو يهزوني تاصل بالامن باش يجيو يسجلو ليا مخالفة ديال الكمامة.. وداك الشي لي دارو سجلو ليا مخالفة ب300 درهم وخلاوني تما مليوح، من بعد متكرفس عليا داك الضابط وحكرني وكان غادي يخنقني تالموت..

هاد الرسالة ديالي كنتمنى توصل للسي الحموشي.. كنتمناها توصل لهاد السيد لي رجع لينا الثقة فالامن الوطني.. لكن كاين شي ناس باقين باغيين يحركونا ويقهرونا.. كنقول ليك ياهاد الضابط الله غادي ينتقم منك.. ولن اتنازل عن حقي في متابعتك.


شاهد أيضا
تعليقات الزوار
Loading...